پارل :پاکستان نے 3 ون ڈے میچوں کی سیریز کے پہلے میچ میں جنوبی افریقا کو 3 وکٹوں سے شکست دے دی۔ میچ جنوبی افریقا کے شہر پارل میں کھیلا گیا جہاں میزبان ٹیم نے ٹاس جیت کر پہلے بیٹنگ کا فیصلہ کیا اور مقررہ 50 اوورز میں 9 وکٹوں پر 239 رنز بنائے۔
پاکستان نے 240 رنز کا ہدف آخری اوور میں 7 وکٹوں کے نقصان پر پورا کرلیا۔
ہینرک کلاسن نے 86 رنز کی شاندار اننگز کھیلی جس میں 2 چھکے اور 7 چوکے شامل تھے۔ ریان ریکلٹن 36، ایڈن مارکرم 35 اور ٹونی ڈی زورزی نے 33 رنز بنائے۔ دیگر بلے بازوں میں مارکو یانسن 10 اور وین ڈر ڈوسین 8 رنز بنا کر آؤٹ ہوئے۔
سلمان علی آغا نے شاندار کارکردگی دکھاتے ہوئے 4 کھلاڑیوں کو آؤٹ کیا، ابرار احمد نے 2 جبکہ صائم ایوب اور شاہین آفریدی نے ایک، ایک وکٹ حاصل کی۔
قومی ٹیم میں صائم ایوب، عبداللہ شفیق، بابر اعظم، محمد رضوان، کامران غلام، سلمان آغا، عرفان خان، شاہین آفریدی، نسیم شاہ، حارث رؤف اور ابرار احمد شامل تھے۔
واضح رہے کہ اس سے قبل پاکستان اور جنوبی افریقا کے درمیان تیسرا ٹی ٹوئنٹی میچ بارش کے باعث منسوخ ہوگیا تھا، اور میزبان ٹیم نے ٹی ٹوئنٹی سیریز 0-2 سے جیت لی تھی۔