سوات:خیبر پختونخوا کے ضلع سوات میں سکیورٹی فورسز اور قانون نافذ کرنے والے اداروں نے مشترکہ انٹیلی جنس بنیاد پر آپریشن کیا، جس کے نتیجے میں 4 خوارج ہلاک ہو گئے۔
پاک فوج کے شعبہ تعلقات عامہ (آئی ایس پی آر) کے مطابق، یہ کارروائی خفیہ اطلاعات کی بنیاد پر کی گئی، جس میں دہشت گردوں کے ایک گروہ کی موجودگی کی نشاندہی ہوئی تھی۔ آپریشن کے دوران سیکیورٹی اہلکاروں نے دہشت گردوں کے ٹھکانے کو گھیرے میں لے کر مؤثر کارروائی کی۔
مارے گئے خوارج متعدد دہشت گرد سرگرمیوں میں ملوث تھے اور ان کے قبضے سے اسلحہ و گولہ بارود بھی برآمد کیا گیا۔ واقعے کے بعد علاقے میں مزید ممکنہ خطرات کے پیش نظر کلیئرنس آپریشن بھی مکمل کیا گیا۔
آئی ایس پی آر کے مطابق، سکیورٹی فورسز اور قانون نافذ کرنے والے ادارے ملک سے دہشت گردی کی لعنت کے خاتمے کے لیے مکمل طور پر پرعزم ہیں۔
