ابوظہبی : متحدہ عرب امارات نے جدید ٹیکنالوجی کی دنیا میں ایک اور اہم پیش رفت کرتے ہوئے چہرے کی شناخت پر مبنی نیا بائیومیٹرک سسٹم متعارف کرانے کی تیاری شروع کر دی ہے، جو مستقبل میں ایمرٹس آئی ڈی (شناختی کارڈ) کی جگہ لے سکتا ہے۔
اماراتی وزیر عبدالرحمان العویس کے مطابق، یہ جدید نظام مصنوعی ذہانت (AI) پر مبنی ہوگا، جس میں فیشل ریکگنیشن (چہرے کی شناخت) اور فنگر پرنٹس شامل ہوں گے۔ حکام کا کہنا ہے کہ اس سسٹم کو اگلے ایک سال میں پورے ملک میں نافذ کیا جا سکتا ہے۔
اس سسٹم کے تحت امارات کے شہری اور رہائشی مختلف سرکاری خدمات، ووٹنگ اور ہوائی اڈوں پر صرف چہرہ اسکین کروا کر اپنی شناخت ظاہر کر سکیں گے، جس سے پاسپورٹ، کارڈ یا طویل انتظار کی ضرورت ختم ہو جائے گی۔ اس سے سکیورٹی بھی بہتر ہوگی اور عوام کو غیر معمولی سہولت بھی ملے گی۔
ابھی فی الحال یہ ٹیکنالوجی ابوظہبی اور دبئی کے ایئرپورٹس پر جزوی طور پر رائج ہے۔ ابوظہبی کا زاید انٹرنیشنل ایئرپورٹ پہلے ہی حکومتی ڈیٹا کی مدد سے مسافروں کی شناخت کرتا ہے، جبکہ دبئی ایئرپورٹ پر موجود "سمارٹ ٹنل" چند سیکنڈز میں امیگریشن کا عمل مکمل کرنے کی صلاحیت رکھتا ہے۔