دبئی : دبئی پولیس نے جعل سازی اور دھوکہ دہی کے الزام میں 2 پاکستانیوں کو گرفتار کرلیا ہے ایک ملزم نے خود کو فلیٹ کا مالک ظاہر کر کے کرایہ دار سے بڑی رقم ہتھیا لی جب کہ دوسرے نے معاہدہ کرایہ داری پر دستخط کیے۔
تفصیلات کے مطابق دبئی میں مقیم دو پاکستانیوں کو حراست میں لے لیا گیا ہے جن پر دھوکہ دہی اور جعل سازی کے ذریعے رقم بٹورنے کا الزام ہے دونوں پاکستانیوں کو جیل منتقل کردیا گیا ہے اور دھوکہ دہی و جعل سازی کی دفعات کے تحت تحقیقات جاری ہیں۔
الخلیج ٹائم کے مطابق دبئی میں مقیم 2 پاکستانیوں نے جعلی کاغذات کی بنیاد پر خود کو فلیٹ کا مالک ظاہر کر کے کرایہ دار سے 59500 درہم ہتھیا لیے بعد ازاں شک ہونے پر کرایہ دار نے پولیس کو مطلع کیا جس پر پولیس نے کارروائی کر کے ملزمان کو حراست میں لے لیا ۔
دبئی پولیس کے مطابق 30 اور 28سالہ پاکستانیوں نے جعلی انتقال نامہ دکھایا اور اس کے بارے میں دعوی کیا کہ یہ کاغذات دبئی لینڈ ڈپارٹمنٹ کی طر ف جاری کیے گئے ہیں تاہم یہ دعوی جھوٹا ثابت ہوا۔
پولیس کا کہنا ہے کہ متاثرہ کرایہ دار نے ملزمان کو 19 مارچ 2016 کو دو چیک کی صورت میں کرایے کی رقم ادا کی تھی جب کہ ایک شخص نے کرایہ داری کے معاہدے پر دستخط کرنے کا اعتراف کیا جسے بہ طور گواہ پیش کیا گیا۔