نیدرلینڈز :وفاقی وزیرِ داخلہ محسن نقوی سے نیدرلینڈز کی سفیر ہینی ڈی وریس نے ملاقات کی جس دوران باہمی دلچسپی کے امور اور دوطرفہ تعلقات پر تفصیل سے تبادلہ خیال کیا گیا۔ دونوں فریقین نے پاکستان اور نیدرلینڈز کے درمیان کرکٹ کے فروغ پر بات کی اور اگلے سال دونوں ممالک کے درمیان کرکٹ سیریز کے انعقاد پر اتفاق کیا۔
نیدرلینڈز نے پاکستان کرکٹ بورڈ (پی سی بی) کے ساتھ مفاہمت کی یادداشت پر دستخط کرنے پر بھی آمادگی ظاہر کی۔ ہینی ڈی وریس نے بتایا کہ نیدرلینڈز کی کرکٹ ٹیم اگلے برس پاکستان کا دورہ کرے گی اور اے ٹیم کے ساتھ میچ کھیلے گی۔
وزیرِ داخلہ محسن نقوی نے کہا کہ پاکستان نے افغان مہاجرین کو کئی دہائیوں تک پناہ دی ہے، اور اب غیر قانونی طور پر مقیم افغان مہاجرین کی واپسی کے لیے جامع پالیسی پر عمل درآمد کیا جا رہا ہے۔ انہوں نے کہا کہ دونوں ممالک کے تعلقات کے مزید فروغ کے لیے پائیدار اقدامات کیے جائیں گے، اور نیدرلینڈز میں کرکٹ کے فروغ کے لیے مکمل حمایت فراہم کی جائے گی۔