لاہور : پاکستان کرکٹ بورڈ (پی سی بی) نے قومی کرکٹ ٹیم کے وائٹ بال ہیڈ کوچ کے عہدے کے لیے سابق کرکٹر عاقب جاوید کو نامزد کرنے کی تیاری کرلی ہے۔ میڈیا رپورٹس کے مطابق، عاقب جاوید کو زمبابوے کے خلاف آنے والی سیریز میں اس اہم ذمہ داری سونپے جانے پر غور کیا جا رہا ہے۔
پاکستان سپر لیگ (پی ایس ایل) میں دو بار کی چیمپئن ٹیم کے ہیڈ کوچ رہ چکے عاقب جاوید کو یہ عہدہ دینے کے فیصلے کا امکان ہے۔ پی سی بی نے غیر ملکی کوچز کے ساتھ تعلقات میں کشیدگی اور تلخ تجربات کے بعد یہ فیصلہ کیا ہے کہ اب قومی ٹیم کے وائٹ بال کوچ کی ذمہ داری ایک مقامی کرکٹر کے سپرد کی جائے۔
اس سے پہلے، گیری کرسٹن نے آسٹریلیا کے دورے سے قبل ہیڈ کوچ کے عہدے سے استعفیٰ دے دیا تھا، جس کے بعد پی سی بی نے ریڈ بال کے ہیڈ کوچ جیسن گلیسپی کو آسٹریلیا کے دورے کے لیے عبوری کوچ مقرر کیا تھا۔
عاقب جاوید کے بارے میں پی سی بی کی جانب سے باضابطہ اعلان جلد متوقع ہے، اور انہیں زمبابوے کے خلاف 24 نومبر سے شروع ہونے والی سیریز میں قومی ٹیم کی کوچنگ کے لیے منتخب کیا جا سکتا ہے۔
اس کے بعد، قومی ٹیم جنوبی افریقا کے خلاف 10 دسمبر سے 7 جنوری تک تین ٹی20، تین ون ڈے اور دو ٹیسٹ میچز کھیلے گی۔ اس سیریز کے دوران بھی عاقب جاوید کو ہیڈ کوچ کی ذمہ داریاں سونپی جا سکتی ہیں۔
