لیما : پیرو کے دارالحکومت لیما میں ایشیا پیسفک اقتصادی تعاون (APEC) تنظیم کا سالانہ سربراہ اجلاس منعقد ہوا، جس میں امریکی صدر جو بائیڈن اور چینی صدر شی جن پنگ کے درمیان اہم ملاقات ہوئی۔ اس ملاقات میں دونوں رہنماؤں نے دوطرفہ تعلقات اور عالمی مسائل پر تبادلہ خیال کیا۔
چینی صدر شی جن پنگ نے اپنے بیان میں کہا کہ چین امریکہ کے ساتھ مستحکم اور پائیدار تعلقات برقرار رکھنے کے لیے پُرعزم ہے اور امریکہ کے ساتھ کام کرنے کی خواہش میں کوئی تبدیلی نہیں آئی ہے۔ انہوں نے کہا کہ چین، ٹرمپ انتظامیہ کے دوران پیدا ہونے والے اختلافات کو دور کرنے کے لیے بھی تیار ہے اور وہ امریکہ کے ساتھ قریبی تعاون کی خواہش رکھتے ہیں۔
انہوں نے واضح کیا کہ اگر دونوں ممالک ایک دوسرے کو صرف حریف سمجھیں گے تو اس سے دونوں ملکوں کو نقصان پہنچے گا اور عالمی استحکام متاثر ہوگا۔
امریکی صدر جو بائیڈن نے بھی چین کے ساتھ تعاون کی اہمیت کو تسلیم کیا اور عالمی مسائل جیسے ماحولیاتی تبدیلی، تجارت اور امن کے حوالے سے مشترکہ کوششوں کی ضرورت پر زور دیا۔
شی جن پنگ نے اس بات پر زور دیا کہ دونوں ممالک کے درمیان اختلافات کے باوجود، ایک دوسرے کے ساتھ تعاون اور بات چیت کا دروازہ ہمیشہ کھلا رہنا چاہیے تاکہ عالمی امن و استحکام کی کوششوں میں کوئی رکاوٹ نہ آئے۔
