اسلام آباد: انسدادِ دہشت گردی عدالت (اے ٹی سی) نے جوڈیشل کمپلیکس حملہ کیسز میں مراد سعید، حماد اظہر اور فرخ حبیب کو مسلسل غیر حاضری پر اشتہاری قرار دے دیا۔
اے ٹی سی کے جج طاہر عباس سپرا نے پی ٹی آئی رہنماؤں کے خلاف کیسز پر سماعت کی، جس دوران پی ٹی آئی کے وکیل سردار مصروف خان عدالت میں پیش ہوئے۔ عدالت نے مسلسل غیر حاضری پر مراد سعید، حماد اظہر اور فرخ حبیب کو اشتہاری قرار دیتے ہوئے ان کے خلاف کارروائی کا آغاز کیا۔
اس کے ساتھ ساتھ عدالت نے واثق قیوم عباسی، راجہ بشارت سمیت دیگر غیر حاضر ملزمان کے وارنٹ گرفتاری بھی جاری کر دیئے۔ انسدادِ دہشت گردی عدالت نے دستیاب ملزمان کی حاضری کے بعد دونوں کیسز پر مزید سماعت 7 اپریل تک ملتوی کر دی۔
واضح رہے کہ پی ٹی آئی رہنماؤں کے خلاف تھانہ رمنا میں دو مقدمات درج ہیں، جن میں ان پر جوڈیشل کمپلیکس پر حملے میں ملوث ہونے کا الزام عائد کیا گیا ہے۔
