جنوبی وزیرستان : خیبر پختونخوا کے علاقے جنوبی وزیرستان کے دونوں اضلاع، جنوبی وزیرستان اپر اور جنوبی وزیرستان لوئر میں کرفیو نافذ کر دیا گیا ہے۔ گزشتہ روز ڈپٹی کمشنرز کی جانب سے کرفیو کے نوٹیفکیشنز جاری کیے گئے۔
نوٹیفکیشن کے مطابق، کرفیو کے دوران صبح 6 بجے سے شام 6 بجے تک تمام راستے بند رہیں گے۔ ان بند راستوں میں زالئی تا نیو کیڈٹ کالج وانا سڑک، تنائی، سرواکئی، جنڈولہ کاور قلعہ روڈ اور احمد وام سے کوٹکئی تک کے راستے شامل ہیں۔ اس کے علاوہ، بی بی رغزئی سے جنڈولہ تک سڑک بھی بند رہے گی، اور ان راستوں پر ہر قسم کی نقل و حرکت پر مکمل پابندی عائد ہوگی۔
مسافروں کو متبادل راستے اختیار کرنے کی ہدایت کی گئی ہے۔ تاہم، وانا گومل زام روڈ مسافروں کے لیے کھلا رہے گا۔ ضلعی انتظامیہ کے مطابق، ٹانک میں بھی آج کرفیو نافذ ہوگا، اور جنڈولہ ٹانک وانا جنوبی وزیرستان شاہراہ بھی بند رہے گی۔
