اسلام آباد: قومی اسمبلی کا اجلاس آج دوپہر 2 بجے دوبارہ شروع ہوگا، جس میں اہم معاملات پر غور کیا جائے گا۔ قومی اسمبلی سیکرٹریٹ نے اجلاس کا 18 نکاتی ایجنڈا جاری کر دیا ہے۔
ایجنڈے میں ٹیکس ڈیجیٹلائزیشن کے لیے فرم کی خدمات لینے کے متعلق توجہ دلاؤ نوٹس شامل ہیں۔ اس کے علاوہ وزیر تجارت جام کمال خان اینٹی ڈمپنگ ڈیوٹیز (ترمیمی) بل 2025،جبکہ وزیر داخلہ محسن نقوی حوالگی ایکٹ 1972 میں ترمیم کا بل 2025، اور سوسائٹیز رجسٹریشن ترمیمی آرڈیننس پیش کریں گے۔
اسی طرح فیڈرل بورڈ آف انٹرمیڈیٹ اینڈ سیکنڈری ایجوکیشن ترمیمی آرڈیننس میں توسیع، اور انکم ٹیکس ترمیمی آرڈیننس میں توسیع کی قراردادیں بھی ایجنڈے کا حصہ ہوں گی۔ اجلاس میں مختلف قائمہ کمیٹیوں کی رپورٹس بھی پیش کی جائیں گی، جن میں کمیٹی انسداد منشیات، کمیٹی مواصلات، کمیٹی خارجہ امور اور کمیٹی آئی ٹی کی یکم جولائی سے 31 مارچ تک کی رپورٹس شامل ہیں۔
علاوہ ازیں کمیٹی توانائی (پٹرولیم ڈویژن) کی رپورٹ بھی ایوان میں پیش کی جائے گی۔ اجلاس میں پارلیمنٹ کے مشترکہ اجلاس سے صدر کے خطاب پر اظہار تشکر کی تحریک بھی پیش کی جائے گی۔ اس کے ساتھ ساتھ نکتہ اعتراضات اور توجہ دلاؤ نوٹس پر مختلف امور پر زیر غور آئیں گے۔