اسلام آباد:سانحہ کرائسٹ چرچ میں شہید ہونے والے پاکستانیوں کی تعداد 9 ہوگئی ہے جس کی دفتر خارجہ نے تصدیق کردی ہے۔
تفصیلات کے مطابق دفتر خارجہ کے ترجمان ڈاکٹر فیصل نے سماجی رابطے کی ویب سائٹ ٹوئٹر پر اطلاع دی کہ کرائسٹ چرچ میں مساجد پر حملے کے نتیجے میں مزید 3 پاکستانیوں کی شہادت کی تصدیق کی ہے۔
Mr Zeeshan Raza, his father Mr Ghulam Hussain and mother Ms. Karam bibi have now been confirmed to have embraced shahadat in the terrroist attack in #NewZealand. We are in touch with their family. A total of 9 Pakistanis embraced shahadat in #NewZealandTerrorAttack
— Dr Mohammad Faisal (@DrMFaisal) March 17, 2019
ترجمان دفتر خارجہ کے مطابق نیوزی لینڈ کے شہر کرائسٹ چرچ کی مساجد میں فائرنگ کے بعد لاپتہ قرار دیئے گئے ذیشان رضا اور ان کے والدین کی شہادت کی تصدیق ہو گئی ہے۔ذیشان رضا ان کے والد غلام حسین اور والدہ کرم بی بی کو حکومت پاکستان نے پہلے لاپتہ قرار دیا تھا۔
اس سے پہلے حکومت نے گزشتہ روز سانحہ میں 6 پاکستانیوں کی شہادت کی تصدیق کی تھی۔ ترجمان دفتر خارجہ ڈاکٹر فیصل کے مطابق شہید پاکستانیوں میں سہیل شاہد، سید جہانداد علی، سید اریب احمد، محبوب ہارون، نعیم راشد اور ان کے بیٹے طلحہ نعیم شہید شامل ہیں۔ڈاکٹر فیصل کے مطابق شہید پاکستانیوں کے ناموں کا اعلان نیوزی لینڈ حکام نے کیا ، مزید 3 پاکستانی بھی لاپتہ ہیں جن کی شناخت کی کوشش جاری ہے۔
لاپتہ افراد میں ذیشان رضا اور ان کے والد و والدہ شامل ہیں۔دوسری جانب وزیر خارجہ شاہ محمود قریشی نے کہاکہ چھ پاکستانیوں کی شہادت کی تصدیق ہوگئی ہے۔ انہوں نے کہاکہ ڈی این اے سے مزید تین افراد کی شناخت کی جائیگی۔
وزارت خارجہ نے شہدا کے اہلخانہ کو نیوزی لینڈ کا ویزا دینے کی سہولیات دینے کا اعلان کرتے ہوئے کہا ہے کہ متاثرین نیوزی لینڈ کا وزٹ ویزا اپلائی کرسکتے ہیں جس کیلئے وہ www.immigration.govt.nz پر وزٹ کرسکتے ہیں۔
