ملتان: پاکستان اور ویسٹ انڈیز کے درمیان دو میچز پر مشتمل سیریز کا پہلا ٹیسٹ میچ ملتان کرکٹ سٹیڈیم میں شروع ہونے والا ہے۔ پاکستان کے کپتان شان مسعود نے ٹاس جیت کر پہلے بیٹنگ کرنے کا فیصلہ کیا ہے۔ تاہم، دھند کی وجہ سے میچ میں تاخیر ہوئی اور امپائرز نے گراؤنڈ کا جائزہ لینے کے بعد دوپہر ایک بجے ٹاس اور ڈیڑھ بجے میچ کے آغاز کا اعلان کیا۔
ٹاس کے موقع پر شان مسعود کا کہنا تھا کہ ان کی کوشش ہوگی کہ پہلی اننگز میں بڑا اسکور کریں تاکہ ویسٹ انڈیز کو پریشانی میں ڈال سکیں۔ انہوں نے مزید کہا کہ ورلڈ ٹیسٹ چیمپئن شپ کی آخری سیریز میں فتح حاصل کر کے سیزن کا اختتام کرنا ان کا پہلا ہدف ہے۔
ویسٹ انڈیز کے کپتان کریگ براتھویٹ نے ٹاس کے بعد کہا کہ اگر ان کے پاس ٹاس جیتنے کا موقع ہوتا تو وہ بھی پہلے بیٹنگ کا فیصلہ کرتے، لیکن ان کا مقصد یہ ہے کہ وہ ابتدائی وکٹیں حاصل کر کے میزبان ٹیم کو مشکل میں ڈالیں۔
قومی ٹیم نے گزشتہ روز ہی اپنی پلیئنگ الیون کا اعلان کیا تھا۔ ٹیم کی قیادت شان مسعود کر رہے ہیں، اور دیگر کھلاڑیوں میں بابر اعظم، کامران غلام، سعود شکیل، محمد رضوان، سلمان علی آغا، ساجد خان، نعمان علی، خرم شہزاد، ابرار احمد اور محمد ہریرہ شامل ہیں۔ نوجوان کرکٹر محمد ہریرہ کا ویسٹ انڈیز کے خلاف ہوم گراؤنڈ پر آج ڈیبیو ہوگا۔