بدین :سندھ حکومت نے معروف شاعر ڈاکٹر آکاش انصاری کی اہلیہ کے لیے مالی امداد کے طور پر 10 لاکھ روپے دینے کا اعلان کیا ہے۔ اس حوالے سے وزیر ثقافت و سیاحت سندھ، سید ذوالفقار علی شاہ نے بدین میں منعقدہ ایک تقریب کے دوران کہا کہ محکمہ ثقافت ڈاکٹر آکاش انصاری کے خاندان کا مکمل خیال رکھے گا۔
انھوں نے ڈاکٹر آکاش انصاری کو خراج تحسین پیش کرتے ہوئے کہا کہ وہ ایک عظیم شاعر تھے اور ان کا خلا کبھی پُر نہیں ہو سکتا۔ وزیر نے مزید کہا کہ ڈاکٹر آکاش نے اپنی اولاد کو پالا پوسا، لیکن افسوس کہ وہی اولاد ان کی دشمن بن گئی۔ یہ بات انھوں نے خاندانی اختلافات کی طرف اشارہ کرتے ہوئے کہی۔
ڈاکٹر آکاش انصاری کی ادبی خدمات کو سراہتے ہوئے سندھ حکومت کی جانب سے یہ اقدام ان کے خاندان کے ساتھ یکجہتی کا اظہار سمجھا جا رہا ہے۔
