تل ابیب : اسرائیل کی کابینہ نے اتوار کے روز میجر جنرل ایال ضمیر کو اسرائیلی ڈیفنس فورس (IDF) کا چیف آف اسٹاف مقرر کرنے کی حتمی منظوری دے دی۔ یہ تقرری اسرائیل کی فوج کے لیے ایک اہم تبدیلی ہے اور ایال ضمیر کا یہ عہدہ سنبھالنا، ان کے کیریئر کے ایک اہم سنگ میل کی علامت ہے۔
رپورٹس کے مطابق، ایال ضمیر نے وزارت دفاع میں ڈائریکٹر جنرل کے فرائض بھی انجام دیے ہیں اور انہیں سابق اسرائیلی آرم چیف لیفٹیننٹ جنرل ہرزی ہلیوی کے استعفی کے بعد یہ عہدہ سونپا گیا۔ ہلیوی نے 7 اکتوبر 2023 کو حماس کے حملے کو روکنے میں ناکامی پر فوجی ذمہ داری قبول کرتے ہوئے استعفی دیا تھا۔
ایال ضمیر آئندہ 5 مارچ کو اسرائیلی فوج کے 24 ویں سربراہ کی حیثیت سے اپنی ذمہ داریاں سنبھالیں گے۔ اس کے علاوہ، میجر جنرل تامیر یدائی کو نئے آرمی چیف کا نائب مقرر کیا گیا ہے۔
