اسلام آباد: عالمی بینک کے ایگزیکٹو ڈائریکٹرز پر مشتمل وفد پاکستان کے 40 ارب ڈالر کے معاشی ترقیاتی فریم ورک پر عملدرآمد کا جائزہ لینے کے لیے اسلام آباد پہنچ گیا۔
وفد کے اراکین وزیر اعظم شہباز شریف اور وزیر خزانہ محمد اورنگزیب سے ملاقات کریں گے، جبکہ اس دوران عالمی بینک کے حکام وزیر برائے اقتصادی امور ڈویژن، وزیر منصوبہ بندی اور وزیر توانائی سے بھی ملاقاتیں کریں گے۔
وزارت خزانہ کے حکام کے مطابق، اس دورے کے دوران عالمی بینک اور پاکستان کے درمیان 40 ارب ڈالرز کی فنڈنگ کے مؤثر عملدرآمد پر بات چیت ہوگی۔ کنٹری پارٹنرشپ فریم ورک کے تحت فنڈنگ کے مؤثر استعمال پر عملدرآمد کا جائزہ لیا جائے گا۔
حکام نے مزید بتایا کہ عالمی بینک کے وفد کی جانب سے پاکستان میں ترقیاتی اقدامات کا جائزہ لیا جائے گا، اور حکمت عملی کے تحت صوبوں سے مشاورت بھی کی جائے گی۔ وفد خیبرپختونخوا، سندھ، پنجاب اور بلوچستان کا دورہ کرے گا تاکہ مقامی سطح پر ترقیاتی منصوبوں پر پیش رفت کا جائزہ لیا جا سکے۔