اسلام آباد: بانی پی ٹی آئی عمران خان اور ان کی اہلیہ بشریٰ بی بی کے خلاف توشہ خانہ کیس کی سماعت بغیر کارروائی کے 27 فروری تک ملتوی کر دی گئی۔
سپیشل جج سینٹرل شاہ رخ ارجمند نے کیس کی سماعت ملتوی کرنے کا فیصلہ کیا۔ عمران خان کے وکیل نے تصدیق کی کہ عدالتی عملے نے باضابطہ طور پر انہیں آگاہ کیا کہ کیس کی سماعت ملتوی کر دی گئی ہے۔ کیس میں اب تک مجموعی طور پر 8 گواہوں کے بیانات قلمبند ہو چکے ہیں، جبکہ 7 گواہوں پر جرح مکمل ہو چکی ہے۔ گزشتہ سماعت پر آٹھویں گواہ پر عمران خان کے وکیل نے جرح کی تھی۔
واضح رہے کہ عمران خان کے وکیل نے جیل ٹرائل کی بجائے اوپن ٹرائل کی درخواست عدالت میں دائر کی ہے۔ درخواست میں کہا گیا کہ اوپن ٹرائل کی درخواست پر فیصلہ ہونے تک توشہ خانہ کیس کی سماعت روک دی جائے۔ عدالت نے اس درخواست پر فریقین کو نوٹس جاری کر دیے ہیں اور اس میں سپرنٹنڈنٹ اڈیالہ جیل، ایف آئی اے اور محکمہ داخلہ پنجاب کو فریق بنایا گیا ہے۔
