جڑانوالہ : جڑانوالہ کی مسجد میں اعلان کرکے لوگوں کو اشتعال دلانے والے یاسین نامی شخص کو گرفتار کر لیا گیا ہے۔
پولیس کا کہنا ہے کہ ملزم یاسین کو منظر عام پر آنے والی ویڈیو کی مدد سے گرفتار کیا گیا۔ویڈیو میں دیکھاجاسکتاہے ملزم مسجد کے اسپیکر پر لوگوں کو جمع ہونے کا کہہ رہا ہے۔
پولیس کے مطابق ویڈیوز کی مدد سے فسادات میں ملوث مزید ملزمان کی شناخت اور گرفتاریوں کی کوشش جاری ہے۔
واضح رہے کہ جڑانوالہ میں گرجا گھروں کو جلانے والے ملزمان تک پہنچنے کے لئے حکومت نے کریک ڈاؤن کا آغاز کر دیا اور اعلیٰ سطح پر انکوائری کا حکم بھی جاری کردیا۔
اس واقعات میں ملوث ہونے کے الزام میں 100 سے زائد افراد کو گرفتار کرکے دو مقدمات درج کرلیے گئے۔ 37 نامزد اور 600 سے زائد نامعلوم ملزمان کے خلاف مقدمات میں انسداد دہشت گردی اور توہین مذہب سمیت 13 سے زائد دفعات لگادی گئیں۔
ضلعی انتظامیہ نے حالات قابو میں رکھنے کے لیے رینجرز کی دو کمپنیاں مختلف مقامات میں تعینات کر دی گئی ہے۔ انتظامیہ نے شہر بھر میں تاحکم ثانی دفعہ 144 نافذ کردی اور جڑانوالہ میں عام تعطیل کا اعلان کیا ہے۔
