راولپنڈی : آرمی چیف جنرل سید عاصم منیر نے کہا ہے کہ شہداء اور غازی ہمارا فخر ہیں اور شہداء کا احترام ہر پاکستانی کے لیے سب سے مقدم ہے۔ ان خیالات کا اظہار انہوں نے جی ایچ کیو راولپنڈی میں فوجی اعزازات دینے کی ایک تقریب میں کیا۔
پاک فوج کے شعبہ تعلقات عامہ (آئی ایس پی آر) کے مطابق، اس تقریب میں آرمی چیف نے پاک فوج کے افسران اور جوانوں کو ان کی غیر معمولی بہادری اور قوم کے لیے خدمات کے اعتراف میں مختلف اعزازات سے نوازا۔ ان اعزازات میں ستارہ امتیاز (ملٹری) اور تمغہ بسالت شامل ہیں، جنہیں شہداء کے اہلخانہ نے بعد از مرگ وصول کیا۔
آئی ایس پی آر کے مطابق، اس موقع پر اعلیٰ فوجی حکام اور ایوارڈ حاصل کرنے والوں کے اہل خانہ کی بڑی تعداد بھی موجود تھی۔ آرمی چیف نے پاک فوج اور قانون نافذ کرنے والے اداروں کی دہشت گردی کے خلاف جنگ میں خدمات کو سراہتے ہوئے کہا کہ آج کا امن اور آزادی شہداء کی لازوال قربانیوں کا نتیجہ ہے، اور ان اداروں کا بے لوث عزم قابلِ تحسین ہے۔
