عمرکوٹ : قومی اسمبلی کے حلقہ این اے 213 عمرکوٹ میں ضمنی انتخاب کے لیے پولنگ کا عمل جاری ہے، جو صبح 8 بجے شروع ہوا اور شام 5 بجے تک بغیر کسی وقفے کے جاری رہے گا۔ الیکشن کمیشن اور ضلعی انتظامیہ کی جانب سے سیکیورٹی کے فول پروف انتظامات کیے گئے ہیں۔
الیکشن کمیشن کے مطابق حلقے میں رجسٹرڈ ووٹرز کی تعداد 6 لاکھ 8 ہزار 997 ہے، جب کہ کل 498 پولنگ اسٹیشنز قائم کیے گئے ہیں۔ ان میں سے 269 پولنگ اسٹیشنز کو حساس اور 91 کو انتہائی حساس قرار دیا گیا ہے۔ امن و امان کی صورتحال کو قابو میں رکھنے کے لیے پولیس اور رینجرز کے خصوصی دستے تعینات کیے گئے ہیں۔
ضمنی انتخاب میں پاکستان پیپلزپارٹی کی امیدوار صباء تالپر اور اپوزیشن کے مشترکہ امیدوار لال چند مالہی کے درمیان سخت مقابلے کی توقع ہے۔ اس کے علاوہ پی ٹی آئی، جی ڈی اے، جے یو آئی، جماعت اسلامی سمیت 18 امیدوار میدان میں ہیں۔
ضمنی انتخاب کے موقع پر ضلع عمرکوٹ بھر میں عام تعطیل کا اعلان کیا گیا ہے تاکہ عوام بلا رکاوٹ اپنا ووٹ کاسٹ کر سکیں۔ یاد رہے کہ یہ نشست پیپلزپارٹی کے سینئر رہنما نواب یوسف تالپر کے انتقال کے بعد خالی ہوئی تھی۔
