کراچی: سندھ ہائی کورٹ نے محکمہ کالج اینڈ ایجوکیشن کو سندھ پبلک سروس کمیشن (ایس پی ایس سی) کے ذریعے گریڈ 16 کی 50 فیصد اسامیوں پر بھرتیوں کو روکنے کا حکم دیا ہے۔
یہ فیصلہ اُس وقت آیا جب ہائیکورٹ میں محکمہ کالج ایجوکیشن میں گریڈ 16 کی بھرتیوں کے حوالے سے درخواست پر سماعت ہو رہی تھی۔ درخواست گزار کے وکیل نے عدالت میں کہا کہ کالج ایجوکیشن کے رولز کے مطابق 50 فیصد اسامیوں پر پروموشن سے بھرتیاں کی جانی چاہئیں اور باقی 50 فیصد ایس پی ایس سی کے ذریعے۔
وکیل نے مزید بتایا کہ محکمہ کالج ایجوکیشن نے ایس پی ایس سی کے ذریعے 251 بھرتیوں کا اشتہار دیا، حالانکہ عدالت پہلے ہی 125 اسامیوں کو خالی رکھنے کا حکم دے چکی تھی۔ عدالت نے رولز کو نظر انداز کر کے تمام بھرتیاں ایس پی ایس سی کے ذریعے کرنے پر اعتراض کیا۔
نتیجتاً، عدالت نے محکمہ کالج اینڈ ایجوکیشن کو 50 فیصد اسامیوں پر ایس پی ایس سی کے ذریعے بھرتیاں کرنے سے روک دیا اور چیف سیکرٹری، سیکرٹری کالج ایجوکیشن سمیت دیگر متعلقہ حکام کو نوٹس جاری کر دیے۔ یہ درخواست محکمہ کالج ایجوکیشن کے ایک ملازم نے دائر کی تھی۔
