مالاجن: ناروے کے علاقے مالاجن میں ایک ماہی گیر کے جال میں مچھلی کی بجائے امریکی جوہری آبدوز پھنس گئی، جس نے ایک غیر معمولی واقعہ کو جنم دیا۔ ناروے کے نشریاتی ادارے کے مطابق، ہیرالڈ انگین نامی ماہی گیر ہالی بٹ مچھلی کے شکار کو واپس گھر لے جا رہا تھا کہ اچانک اسے ایک پیغام موصول ہوا، جس میں کہا گیا کہ اس کے جالوں میں ایک آبدوز کے پروپلرز پھنس گئے ہیں، اور وہ آبدوز اس کے جال کو کھینچتے ہوئے 2 ناٹیکل میل دور لے گئی ہے۔
یہ آبدوز امریکی نیوی کی جوہری آبدوز *یو ایس ایس ورجینیا* تھی، جو ناروے کی بندرگاہ *Tromso* کی طرف جا رہی تھی۔ ناروے کے کوسٹ گارڈز نے اس واقعے کی تصدیق کرتے ہوئے کہا کہ ان کے جہاز نے فوری طور پر جال کاٹ کر آبدوز کو آزاد کرایا۔
ہیرالڈ انگین نے اس واقعے پر ردعمل دیتے ہوئے کہا کہ وہ جانتا تھا کہ دیگر بحری جہاز مچھلی کے جالوں کے قریب سے گزرتے ہیں، لیکن اس سے پہلے اس نے کبھی نہیں سنا تھا کہ کوئی آبدوز ایسا کرے۔ تاہم، اس نے اس غیر معمولی واقعے پر غصہ ظاہر نہیں کیا اور کہا کہ کوسٹ گارڈز نے اس کے ساتھ رابطہ کر کے ممکنہ زرتلافی کے حوالے سے بات کی ہے۔
امریکی فوج کے ترجمان نے بھی اس واقعے کی تصدیق کی ہے، تاہم انہوں نے اس کے بارے میں مزید تفصیلات دینے سے گریز کیا۔
