لاہور: امیر جماعت اسلامی حافظ نعیم الرحمان نے حکومت کی جانب سے 70 روپے فی لیٹر پیٹرول لیوی کو سختی سے مسترد کرتے ہوئے مطالبہ کیا ہے کہ فوری طور پر پیٹرول اور بجلی کی قیمتوں میں کمی کی جائے تاکہ عوام کو ریلیف مل سکے۔
اپنے بیان میں انہوں نے کہا کہ ملک کے معاشی حالات روز بروز خراب ہو رہے ہیں، اور حکومت کی غلط پالیسیوں کی وجہ سے عوام شدید مشکلات کا شکار ہیں۔
حافظ نعیم الرحمان نے کہا کہ جب عوام کے مینڈیٹ پر ڈاکہ ڈالا جائے تو وہ حکمرانوں سے کیسے یکجہتی کا مظاہرہ کریں؟ جب تک فارم 47 کے مطابق حکومتیں مسلط کی جاتی رہیں گی، ملک میں استحکام نہیں آئے گا۔
کراچی کی سیاسی صورتحال پر بات کرتے ہوئے انہوں نے کہا کہ وہاں کے عوام جانتے ہیں کہ ایم کیو ایم کو جعلی طریقے سے اقتدار میں لایا گیا ہے۔ حکومت کی ذمہ داری ہے کہ عوام کو سستی اور معیاری تعلیم، صحت کی سہولیات اور روزگار فراہم کرے۔
انہوں نے مزید کہا کہ حکمران طبقہ خود کو تعلیم یافتہ کہتا ہے لیکن قوم کے بچوں کو جاہل بنانے کی کوشش کر رہا ہے۔ ریاست کا فرض ہے کہ عوام کو بنیادی سہولیات فراہم کرے اور ملک میں امن و امان کو یقینی بنایا جائے۔ مگر بدقسمتی سے حکومت عوام کو ریلیف دینے کے بجائے مزید مالی بوجھ ڈال رہی ہے۔
جماعت اسلامی نے حکومت کو وارننگ دیتے ہوئے کہا کہ اگر عوامی مسائل حل نہ کیے گئے تو ملک بھر میں شدید احتجاج کیا جائے گا۔