کوئٹہ : ریلوے حکام کے مطابق، کوئٹہ سے چمن کے لیے مسافر ٹرین 4 روز معطل رہنے کے بعد آج روانہ ہوگی، تاہم کوئٹہ سے دیگر صوبوں کے لیے ٹرین سروس بدستور معطل رہے گی۔ یہ سروس 11 مارچ کو جعفر ایکسپریس پر ہونے والے حملے کے بعد معطل کی گئی تھی۔
دوسری جانب بلوچستان کے ضلع کچھی کے علاقے مشکاف میں ریلوے ٹریک اور اس کے اطراف کے علاقے کو کلیئر کر دیا گیا ہے۔ حکام کے مطابق جعفر ایکسپریس پر حملے کے بعد متاثرہ ریلوے ٹریک کی مرمت کے لیے سبی اور مچھ سے ریلیف ٹرین روانہ کر دی گئی ہے، اور مرمت کا کام آج سے شروع کیا جائے گا۔
حکام نے بتایا کہ حملے میں جعفر ایکسپریس کے انجن سمیت 5 بوگیوں کو نقصان پہنچا، جبکہ مشکاف میں 382 فٹ ریلوے ٹریک متاثر ہوا۔ حکام کا کہنا ہے کہ ٹریک کی مرمت میں 8 سے 10 گھنٹے درکار ہوں گے اور کوشش کی جا رہی ہے کہ ٹریک کی جلد مرمت کر کے ٹرین سروس بحال کی جائے۔