بیجنگ : چین نے اپنی اگلی نسل کو ٹیکنالوجی کی تیز رفتار ترقی کے ساتھ ہم آہنگ کرنے کے لیے پرائمری اور سیکنڈری سطح پر بچوں کو مصنوعی ذہانت (آرٹیفشل انٹیلیجنس) پڑھانے کا فیصلہ کیا ہے۔
چینی میڈیا کے مطابق، اس اقدام کا مقصد ملک میں آرٹیفیشل انٹیلیجنس (اے آئی) کے شعبے کو مزید ترقی دینا اور اس کے لیے درکار ماہر افراد کی کھیپ تیار کرنا ہے۔چینی حکومت کے اس فیصلے کے بعد، رواں سال کے آخر تک آرٹیفیشل انٹیلی جنس کے اسباق کو پرائمری اور سیکنڈری سکولوں کے نصاب میں شامل کر دیا جائے گا۔
سکولز اس کو ایک علیحدہ مضمون کے طور پر یا پھر انفارمیشن ٹیکنالوجی اور سائنس جیسے مضامین کے ساتھ ملا کر بھی پڑھا سکیں گے۔ چین کی مصنوعی ذہانت کی صنعت نے رواں سال کے آغاز میں عالمی سطح پر توجہ حاصل کی تھی، جب ایک چینی کمپنی "ڈیپ سیک" نے اپنے اے آئی چیٹ بوٹ کا جدید ورژن جاری کر کے عالمی مارکیٹوں میں اپنی پہچان بنائی۔ اس کے بعد چین نے حال ہی میں ایسا اے آئی ماڈل روبوٹ تیار کیا ہے جو کسی ہدایت کے بغیر خود فیصلے کرنے کی صلاحیت رکھتا ہے۔