ابوظہبی: کوئٹہ گلیڈی ایٹرز کے اہم کھلاڑی فاف ڈوپلسی پی ایس ایل 6 سے باہر ہو گئے۔
پاکستان سپر لیگ کے چھٹے ایڈیشن میں گوئٹہ گلیڈی ایٹرز اور پشاور زلمی کے درمیان اتوار کو ہونے والے میچ کے دوران فیلڈنگ کرتے ہوئے جنوبی افریقی بلے باز فاف ڈوپلسی زخمی ہو گئے تھے تاہم اب خبر سامنے آئی ہے کہ وہ پی ایس ایل 6 کے بقیہ میچز میں شرکت نہیں کرسکیں گے اور واپس اپنے ملک روانہ ہو رہے ہیں۔
میچ کے دوران پشاور زلمی کے بلے باز ڈیوڈ ملر کی جانب سے زور دار شارٹ کو روکنے کے لیے فاف ڈوپلسی اور محمد حسنین گیند کی طرف دوڑے تاہم دونوں کی اس کوشش کے دوران فاف ڈوپلسی کا سر محمد حسنین کے گھٹنے سے ٹکرا گیا جس سے وہ شدید زخمی ہوکر گراؤنڈ سے باہر چلے گئے۔
Thank you everyone for all the messages of support. I'm back at the hotel recovering. Have concussion with some memory loss but I will be fine. Hopefully be back on the field soon. Much love. ❤️
— Faf Du Plessis (@faf1307) June 13, 2021
بعد ازاں فاف ڈوپلسی کو اسپتال پہنچایا گیا جہاں انہیں طبی امداد دی گئی اور گزشتہ روز اس حوالے سے کوئٹہ گلیڈی ایٹرز کے بلے باز نے ٹوئٹ میں مداحوں کا شکریہ ادا کرتے ہوئے کہا کہ وہ اب پہلے سے بہتر محسوس کررہے ہیں تاہم انہیں میچ کے دوران محمد حسنین کے ساتھ ٹکراو یاد نہیں تاہم وہ بہت جلد ٹھیک ہوکر واپس ٹیم کا حصہ بن جائیں گے۔
خیال رہے فاف ڈوپلسی نے پی ایس ایل کے رواں سیزن میں کوئٹہ گلیڈی ایٹرز کی جانب سے 5 میچز کھیلے جس میں وہ 4 اننگز میں صرف 76 رنز ہی بنا سکے جب کہ گزشتہ سیزن میں وہ پشاور زلمی کی جانب سے صرف ایک ہی میچ کھیل سکے تھے۔
