لاہور : محکمہ موسمیات نے پاکستان کے مختلف علاقوں میں بارش اور سرد موسم کی پیشگوئی کی ہے۔ محکمہ کے مطابق ملک کے بیشتر حصوں میں موسم سرد اور خشک رہے گا جبکہ پہاڑی علاقوں میں شدید سردی کا امکان ظاہر کیا گیا ہے۔
اسلام آباد اور اس کے گرد و نواح میں موسم سرد اور مطلع ابر آلود رہنے کی توقع ہے۔ پنجاب کے بیشتر اضلاع میں بھی موسم سرد اور خشک رہنے کی پیشگوئی کی گئی ہے، اور لاہور، شیخوپورہ، قصور، اوکاڑہ، ساہیوال، سیالکوٹ، نارووال، گوجرانوالہ سمیت دیگر شہروں میں دھند چھائے رہنے کا امکان ہے۔ مری، گلیات اور ان کے گرد و نواح میں شدید سرد موسم اور ہلکی بارش و برفباری کی پیشگوئی کی گئی ہے۔
گلگت بلتستان میں موسم شدید سرد اور جزوی طور پر ابر آلود رہنے کی توقع ہے، جبکہ کشمیر اور ملحقہ پہاڑی علاقوں میں ہلکی برفباری اور بارش ہو سکتی ہے۔ سندھ اور بلوچستان کے بیشتر اضلاع میں موسم سرد اور خشک رہنے کا امکان ہے، اور پہاڑی علاقوں میں رات کے اوقات میں شدید سردی کی لہر آ سکتی ہے۔ خیبرپختونخوا کے بیشتر اضلاع میں بھی موسم سرد اور خشک رہے گا، اور پہاڑی علاقوں میں شدید سردی اور جزوی طور پر ابر آلود موسم رہے گا۔
