کیلیفورنیا : ایپل کی جانب سے اس سال کا سستا ترین آئی فون، یعنی آئی فون ایس ای 4، 19 فروری کو متعارف کرایا جائے گا۔ اس فون کے حوالے سے کئی مہینوں سے لیکس اور افواہیں سامنے آ رہی تھیں، اور اب کمپنی کے چیف ایگزیکٹو ٹم کک نے باضابطہ طور پر اعلان کیا ہے کہ صارفین "ہماری فیملی کے نئے رکن سے ملنے کے لیے تیار ہو جائیں"۔
اگرچہ ٹم کک نے اپنی پوسٹ میں یہ نہیں بتایا کہ کمپنی کیا متعارف کرانے جا رہی ہے، تاہم اس بات کا عندیہ دیا کہ 19 فروری کو ایپل کی جانب سے کوئی نیا پروڈکٹ پیش کیا جائے گا۔ مختلف رپورٹس کے مطابق، اس دن آئی فون ایس ای 4 کی لانچ کی توقع کی جا رہی تھی، اور اب ٹم کک کے اعلان کے بعد یہ بات واضح ہو گئی ہے کہ ایپل اس دن آئی فون ایس ای 4 پیش کرے گا۔ اس کے ساتھ ساتھ ائیر ٹیگ 2 بھی متعارف کرایا جا سکتا ہے۔
لیک کی گئی اطلاعات کے مطابق، آئی فون ایس ای 4 کا ڈیزائن اس سیریز کے دیگر فونز کے مقابلے میں بہتر ہوگا۔ اس میں پہلی بار ہوم بٹن کو ہٹایا جائے گا اور آئی فون 14 جیسے فل اسکرین ڈیزائن کو اپنایا جائے گا۔ فرنٹ کیمرے کو نوچ ڈیزائن میں چھپایا جائے گا تاکہ فیس آئی ڈی کا استعمال ممکن ہو سکے۔
آئی فون ایس ای 4 میں 6.1 انچ کا او ایل ای ڈی ڈسپلے دیا جائے گا اور اس میں ایپل کی نئی اے 18 چپ موجود ہوگی جو گزشتہ سال کے آئی فون 16 اور 16 پلس میں استعمال کی گئی تھی۔ بیک پر 48 میگا پکسل کا کیمرہ اور فرنٹ پر 24 میگا پکسل کا کیمرہ متوقع ہے۔ پہلی بار آئی فون ایس ای سیریز میں چارجنگ کے لیے یو ایس بی سی پورٹ دی جائے گی، اور ایپل کی جانب سے خود تیار کردہ موڈیم کے استعمال کا بھی امکان ہے، مگر اس حوالے سے کوئی حتمی تصدیق نہیں کی گئی۔
یاد رہے کہ ایپل نے 2016 میں پہلا آئی فون ایس ای متعارف کرایا تھا، جسے ایک سستا آئی فون قرار دیا گیا تھا، جس میں مہنگے ماڈلز جیسے فیچرز موجود تھے۔
