راولپنڈی : راولپنڈی میں خشک سالی کے باعث پانی کے بحران کے شدت اختیار کرنے پر واسا راولپنڈی نے ایمرجنسی نافذ کر دی ہے۔ واسا کے مطابق، محکمہ موسمیات نے فروری اور مارچ میں کم بارشوں کی پیشگوئی کی ہے، جس کے نتیجے میں پانی کا مسئلہ مزید سنگین ہو سکتا ہے۔
ایم ڈی واسا نے کہا کہ "اگر بارشیں نہ ہوئیں تو پانی کی کمی سے جڑواں شہروں میں بحران پیدا ہو جائے گا۔" انہوں نے شہریوں سے اپیل کی کہ وہ پانی کا استعمال کم کریں اور واسا کے ساتھ تعاون کریں۔ اس کے علاوہ، واسا نے پانی ضائع کرنے پر 2 شہریوں کے چالان بھی کیے ہیں۔
خان پور ڈیم کی صفائی کے باعث 22 فروری تک پانی کی سپلائی معطل رہے گی، جبکہ راول ڈیم میں پانی کا سطح تیزی سے گر رہا ہے۔ راول ڈیم میں پانی کی گنجائش 1743.30 فٹ سے کم ہو کر 1669 فٹ تک پہنچ چکی ہے، اور پانی کی آمد نہ ہونے کے برابر ہے۔
ایم ڈی واسا نے مزید بتایا کہ راول ڈیم میں صرف 45 دن کا پانی ذخیرہ ہے، اور بارشوں کی کمی کے باعث پانی کی شدید کمی کا سامنا ہو سکتا ہے۔ اسلام آباد میں بھی کم بارشوں کے باعث خشک سالی کے خطرے کا امکان ظاہر کیا جا چکا ہے۔
