لاہور: پنجاب حکومت نے لاہور میں سموگ اور فضائی آلودگی کے مسئلے کو حل کرنے کے لیے ایک بڑی مہم شروع کی ہے۔ اس مہم کے تحت 978 ایکڑ زمین پر قدرتی جنگل اگائے جائیں گے تاکہ شہر کی فضاؤں کو صاف اور آکسیجن سے بھرپور بنایا جا سکے۔
اس منصوبے کا آغاز دریائے راوی کے کنارے 144 ایکڑ پر ایک لاکھ پانچ ہزار درخت لگا کر کیا جا چکا ہے، اور مجموعی طور پر 6 لاکھ 34 ہزار درخت لگانے کا ہدف رکھا گیا ہے۔ اس سے نہ صرف لاہور کی فضائی آلودگی کم ہو گی، بلکہ شہر کی فضاء میں تازگی بھی آئے گی۔
سینئر صوبائی وزیر مریم اورنگزیب نے کہا کہ لاہور کو سرسبز اور آلودگی سے پاک بنانا وزیراعلیٰ مریم نواز کی اہم ترجیح ہے۔ انہوں نے اس بات پر زور دیا کہ یہ منصوبہ لاہور کی فضا میں بہتر آکسیجن فراہم کرنے اور سموگ کے خاتمے میں مددگار ثابت ہوگا۔
پنجاب حکومت نے محکمہ فارسٹ اور روڈا کے ذریعے اس شجرکاری مہم کا آغاز کیا ہے اور شہریوں سے اپیل کی ہے کہ وہ اس مہم میں حصہ لے کر لاہور کو سموگ سے پاک بنانے میں مدد کریں۔ یہ منصوبہ نہ صرف لاہور کی ماحولیاتی حالت کو بہتر کرے گا بلکہ ایک گرین انقلاب کی جانب اہم قدم بھی ثابت ہو گا۔