نئی دہلی: بھارت کے شہر نئی دہلی کے ایک ریلوے سٹیشن پر بھگدڑ مچنے سے 18 افراد ہلاک جبکہ متعدد زخمی ہوگئے ہیں۔ بھارتی میڈیا رپورٹس کے مطابق یہ حادثہ ہندوؤں کے مذہبی تہوار کمبھ میلے کے دوران اس وقت پیش آیا جب ریلوے سٹیشن پر شدید رش تھا۔ اسی دوران، ریلوے سٹیشن کے ایک پلیٹ فارم پر دوسرے پلیٹ فارم کے مسافروں کے آنے سے بھگدڑ مچ گئی۔
رپورٹس میں بتایا گیا ہے کہ بھگدڑ کے دوران کچلے جانے سے 18 افراد کی موت واقع ہوئی، جن میں 10 خواتین اور 3 بچے شامل ہیں۔ متعدد افراد زخمی بھی ہوئے ہیں جنہیں ہسپتال منتقل کر دیا گیا ہے۔وزیر اعظم نریندر مودی نے اس واقعے پر افسوس کا اظہار کرتے ہوئے اپنے پیغام میں کہا کہ وہ ان تمام لوگوں کے ساتھ ہیں جنہوں نے اپنے پیاروں کو کھو دیا ہے۔ حکام نے واقعے کی تحقیقات شروع کر دی ہیں اور امدادی کارروائیاں جاری ہیں۔
