اسلام آباد : محکمہ موسمیات نے ملک کے مختلف حصوں میں ہلکی بارش اور پہاڑی علاقوں میں برفباری کی پیشگوئی کی ہے۔ رپورٹ کے مطابق، ملک کے بیشتر علاقوں میں موسم سرد اور خشک رہے گا، جبکہ پہاڑی علاقوں میں شدید سردی اور جزوی طور پر ابر آلود موسم متوقع ہے۔ اسلام آباد اور گرد و نواح میں سرد موسم اور جزوی ابر آلود رہنے کا امکان ہے۔
بلوچستان کے بیشتر علاقوں میں سرد اور خشک موسم کی پیشگوئی کی گئی ہے، جبکہ پہاڑی علاقوں میں شدید سردی اور جزوی ابر آلود موسم رہے گا۔پنجاب کے بیشتر اضلاع میں بھی سرد اور خشک موسم ہوگا، تاہم مری، گلیات اور ارد گرد کے علاقوں میں موسم سرد اور جزوی طور پر ابر آلود رہنے کی توقع ہے۔ صبح کے وقت ساہیوال، اوکاڑہ، ملتان، بہاولپور، رحیم یار خان، بہاولنگر اور ان کے اطراف میں ہلکی دھند چھا سکتی ہے۔
سندھ کے بیشتر علاقوں میں سرد اور خشک موسم رہے گا، تاہم صبح کے اوقات میں سکھر، شکار پور، کشمور، خیر پور اور گرد و نواح میں ہلکی دھند کا سامنا ہو سکتا ہے۔ خیبرپختونخوا کے بیشتر اضلاع میں موسم سرد اور خشک رہے گا، لیکن چترال، دیر، سوات اور کرم میں ہلکی بارش اور پہاڑوں پر ہلکی برفباری کی پیشگوئی کی گئی ہے۔ کشمیر اور گلگت بلتستان میں بھی موسم شدید سرد اور جزوی ابر آلود رہنے کا امکان ہے۔
