مستونگ: بلوچستان نیشنل پارٹی (مینگل) نے مستونگ کے علاقے لکپاس پر گزشتہ 20 روز سے جاری دھرنا ختم کرنے کا فیصلہ کیا ہے۔ پارٹی کے سربراہ اختر مینگل نے دھرنا ختم کرنے کا اعلان کرتے ہوئے کہا کہ ان کی جماعت عوامی مشکلات کے پیش نظر اب اضلاع میں احتجاجی ریلیاں نکالے گی۔
اختر مینگل کا کہنا تھا کہ 18 اپریل کو کوئٹہ میں بی این پی کی مرکزی کابینہ کا اجلاس ہوگا، جس میں آئندہ کے لائحہ عمل پر غور کیا جائے گا۔ انہوں نے مزید کہا کہ بلوچستان کے مختلف اضلاع میں احتجاجی ریلیوں کا شیڈول بھی طے کر لیا گیا ہے۔
بی این پی نے گزشتہ کئی روز سے لکپاس پر دھرنا دے رکھا تھا اور دھرنا ختم کرنے کے لیے بلوچستان حکومت کے ساتھ کئی مرتبہ مذاکرات بھی ہوئے تھے۔