لاہور : محکمہ موسمیات نے آنے والے دنوں میں ملک کے مختلف علاقوں میں تیز ہواؤں، گرج چمک اور کہیں کہیں موسلادھار بارش کی پیشگوئی جاری کر دی ہے، جبکہ بعض مقامات پر ژالہ باری کا بھی امکان ظاہر کیا گیا ہے۔
محکمہ موسمیات کے مطابق ملک کے بیشتر علاقوں میں دن کے وقت موسم گرم اور خشک رہے گا، تاہم شام یا رات کے وقت خاص طور پر بالائی خیبرپختونخوا، خطۂ پوٹھوہار، اسلام آباد، شمال مشرقی پنجاب، شمال مشرقی بلوچستان، کشمیر اور گلگت بلتستان میں تیز ہوائیں اور گرج چمک کے ساتھ بارش متوقع ہے۔
اسلام آباد میں دن کے وقت موسم گرم اور خشک رہے گا، جبکہ شام میں آندھی اور گرج چمک کے ساتھ بارش اور کہیں کہیں ژالہ باری کا امکان ہے۔ لاہور، راولپنڈی، گوجرانوالہ، سیالکوٹ، نارووال، چکوال، میانوالی سمیت پنجاب کے متعدد شہروں میں تیز ہوائیں اور گرج چمک کے ساتھ بارش کا امکان ہے۔
مری، گلیات اور آس پاس کے علاقوں میں شام یا رات کے وقت موسلادھار بارش ہو سکتی ہے۔ سندھ کے بیشتر اضلاع میں موسم شدید گرم اور خشک رہے گا، تاہم کچھ مقامات پر دوپہر کے بعد تیز ہوائیں چل سکتی ہیں۔ بلوچستان کے علاقوں ژوب، موسیٰ خیل، خضدار، کوہلو، لورالائی وغیرہ میں گرج چمک اور بارش کا امکان ظاہر کیا گیا ہے۔
خیبرپختونخوا کے علاقوں پشاور، دیر، سوات، مانسہرہ، کرم، باجوڑ، ٹانک اور دیگر مقامات پر جھکڑ کے ساتھ بارش ہو سکتی ہے۔ کشمیر اور گلگت بلتستان میں بھی مطلع جزوی ابر آلود رہنے کے علاوہ تیز ہوائیں اور گرج چمک کے ساتھ بارش کی توقع ہے، جبکہ بعض علاقوں میں ژالہ باری بھی ہو سکتی ہے۔
محکمہ موسمیات کے مطابق یہ سلسلہ آج سے 20 اپریل تک جاری رہ سکتا ہے، جبکہ 18 اور 19 اپریل کو جنوبی پنجاب، ساہیوال اور اوکاڑہ میں بھی جھکڑ چلنے کا امکان ہے۔