غزہ: اسرائیل کی جانب سے غزہ پر جاری وحشیانہ اور دہشت گردانہ حملوں میں گزشتہ 24 گھنٹوں میں مزید 17 فلسطینی شہید ہوگئے، جبکہ 69 افراد زخمی ہو گئے ہیں۔ عرب میڈیا کے مطابق، اسرائیلی فضائی حملوں نے غزہ کے آخری مکمل فعال ہسپتال کو بھی تباہ کر دیا، جس سے صحت کی خدمات مزید متاثر ہوئیں۔
جنوبی غزہ میں ایک فیلڈ ہسپتال پر ہونے والے حملے میں متعدد فلسطینیوں کی شہادت اور زخمی ہونے کی اطلاعات ہیں۔ اسرائیلی حملوں کی وجہ سے طبی سامان اور ادویات کی کمی پیدا ہوگئی ہے، جس کی وجہ سے سیکڑوں مریضوں کی زندگیاں شدید خطرے میں ہیں۔
فلسطینی وزارت صحت کے مطابق، غزہ میں 51,000 فلسطینی شہید ہو چکے ہیں اور 116,343 فلسطینی زخمی ہو چکے ہیں۔سعودی عرب، قطر اور دیگر ممالک نے غزہ کے ہسپتال پر اسرائیلی فضائی حملے کی شدید مذمت کی ہے۔
فلسطینی صدر محمود عباس نے فرانسیسی صدر ایمانوئل میکرون سے ٹیلی فونک رابطہ کیا، جس میں دونوں رہنماؤں نے غزہ میں جنگ بندی اور انسانی امداد کی فوری ترسیل پر زور دیا۔ اس کے علاوہ، دونوں نے فلسطین کے دو ریاستی حل کی ضرورت پر بھی بات کی۔
دوسری جانب، حماس نے اسرائیل کی طرف سے جنگ بندی کی نئی تجویز پر ردعمل دیتے ہوئے کہا کہ حماس کو غیر مسلح کرنے کی درخواست سنے جانے کے قابل نہیں ہے۔
