الینوائے : امریکا میں اسٹور ملازمہ نے بہادری کا مظاہرہ کرتے ہوئے ڈاکو کو قابو کرکے ڈکیتی کی کوشش ناکام بنادی لیکن اسٹور انتظامیہ نے خاتون کو ملازمت سے معطل کردیا۔
تفصیلات کے مطابق امریکی ریاست الینوائے میں ایک خاتون ملازمہ نے بہادری کی مثال قائم کرتے ہوئے اسٹور میں ڈکیتی کی واردات ناکام بنادی۔ غیر ملکی خبر رساں ادارے کے مطابق یہ واقعہ 5 ستمبر کو راک فورڈ کے ایک سب وے اسٹور پر پیش آیا۔
جہاں ارسیلی سوٹیلو نامی ملازمہ سے ایک شخص نے اسلحے کے زور پر رقم کا مطالبہ کیا۔ مذکورہ واقعے کی ویڈیو گزشتہ روز ٹک ٹاک پر پوسٹ کی گئی ویڈیو اتنی وائرل ہوئی کی اسے اب تک نو ملین سے زیادہ بار دیکھا جا چکا ہے۔
سی سی ٹی وی کیمرے کی فوٹیج میں دیکھا جاسکتا ہے کہ سب وے ملازمہ ارسیلی سوٹیلو کاؤنٹر کے پیچھے کھڑے ڈاکو سے جواں مردی سے مقابلہ کررہی ہے جس نے اس سے اس کا پرس چھیننے کی کوشش کی۔
اسی ہاتھا پائی کے دوران ڈاکو کے ہاتھ سے اس کا پستول گر جاتا ہے جسے موقع پاکر ارسیلی اٹھا لیتی ہے اور اسی پستول سے ڈاکو کے سر پرحملہ کرتی ہے۔
تاہم بعد ازاں ڈاکو فرار ہونے میں کامیاب ہوجاتا ہے، سوٹیلو نے میڈیا کو بتایا کہ میں نے ڈاکو سے کہا کہ میرے پاس پیسے نہیں ہیں جس پر ڈاکو نے جواب دیا کہ اس سے پہلے کہ میں تمہیں گولی ماروں مجھے سب کچھ دے دو۔
دوسری جانب سب وے اسٹور انتظامیہ نے ارسیلی سوٹیلو کو ملازمت سے معطل کردیا ہے ان کا کہنا ہے کہ سی سی ٹی وی کیمرے کی ویڈیو کیسے سوشل میڈیا پر پوسٹ کی گئی اور کس نے کی۔
اس کے بارے میں ارسیلی نے بتایا کہ مجھے نہیں معلوم کہ یہ ویڈیو کب اور کیسے لیک ہوئی اس کے باوجود سب وے انتظامیہ نے اسے مطلع کیا ہے کہ وہ اس وقت تک اپنی ملازمت سے معطل رہے گی جب تک کہ یہ فوٹیج کی تمام ویڈیوز انٹرنیٹ سے نہ ہٹالی جائیں۔
