راولپنڈی: ایئر چیف مارشل ظہیر احمد سدھو کو بحرین کے فرسٹ کلاس میڈل سے نوازا گیا ہے۔ پاک فوج کے شعبہ تعلقات عامہ (آئی ایس پی آر) کے مطابق بحرین کے نائب فرمانروا نے ایئر چیف مارشل کو بحرین میڈل فرسٹ کلاس سے نوازا، جو کہ ان کی فوجی اور دفاعی تعاون میں شاندار خدمات کے اعتراف میں دیا گیا۔
یہ اعزاز بحرین کی ساخر ایئربیس پر ایک پروقار تقریب کے دوران ایئر چیف مارشل کو دیا گیا، جس میں بحرین کی اعلیٰ سول اور فوجی قیادت بھی موجود تھی۔ ایئر چیف مارشل سدھو نے اس اعزاز کو دونوں ممالک کے تعلقات کو مزید مستحکم کرنے کی علامت قرار دیتے ہوئے بحرینی قیادت کا شکریہ ادا کیا۔
ایئر چیف مارشل نے بحرین انٹرنیشنل ایئر شو کے دوران امریکی ایئر فورس سینٹرل کمانڈ کے کمانڈر لیفٹیننٹ جنرل ڈیرک فرانس سے بھی ملاقات کی۔ بحرین انٹرنیشنل ایئر شو میں پاکستان کے جے ایف 17 بلاک تھری لڑاکا طیارے نے بھی شرکت کی۔
