پیرس:لالی ووڈ کے ستارے کی بین الاقوامی فلمی میلے 'کانز' میں انٹری،پاکستانی سٹار ماہرہ خان نے ’کانز فیسٹیول' میں ریڈ کارپٹ پر جلوے بکھیر کر سب کو اپنی جانب متوجہ کرلیا۔
تفصیلات کے مطابق فرانس میں کانز فلم فیسٹول کی رنگینیاں اور71ویں کانز میلے میں پاکستانی سٹار اداکارہ ماہرہ خان نے ریڈکارپٹ پر جلوے بکھیرے جبکہ فیسٹیول کے دوران ماہرہ کی بھارتی اداکارہ سونم کپور سے بھی ملاقات ہوئی۔
اداکارہ ماہرہ خان نے ریڈ کارپٹ پر واک کرنے کے دوران سیاہ رنگ کا لباس زیب تن کیا تھا جس میں وہ انتہائی خوبصورت اور جاذب نظر دکھائی دے رہی تھی۔واک کے دوران وہ انتہائی پر اعتماد نظر آئی اور انہوں نے وہاں پر موجود فوٹو گرافروں کیلئے پوز دیئے۔
خیال رہے کہ اداکارہ ماہرہ خان بین الاقوامی برانڈ لوریل پیرس کی برانڈ ایمبسیڈر کے طور پرپہلی بار پاکستان کی نمائندگی کررہی ہیں۔
اداکارہ کانز فیسٹیول کے ریڈ کارپٹ انٹری کا اعزاز حاصل کرنے والی پہلی پاکستانی فن کار ہ ہیں۔ماہرہ خان کی انٹرنیشنل فلم فیسٹیول کانز کے دوران لی گئی تصاویر نے دھوم مچادی،8 مئی کو شروع ہونے والا کانز فلم فیسٹیول 19 مئی تک جاری رہے گا۔