اسلام آباد: عالمی مالیاتی ادارے (آئی ایم ایف) نے پاکستان کے موجودہ قرض پروگرام پر مکمل عمل درآمد کی تصدیق کرتے ہوئے ایک اعلامیہ جاری کیا ہے۔ اعلامیے میں کہا گیا ہے کہ پاکستان نے منیجمنٹ، توانائی، صحت، تعلیم، سماجی تحفظ اور ماحولیاتی تبدیلیوں کے شعبوں میں اہم پیشرفت دکھائی ہے، اور آن لائن مذاکرات کا سلسلہ جاری رہے گا۔
آئی ایم ایف کی ٹیم، جس کی قیادت نیتھن پورٹر کر رہے تھے، 24 فروری سے 14 مارچ تک پاکستان میں موجود رہی۔ دورے کے دوران پاکستان نے توانائی کے شعبے میں لاگت کم کرنے، معاشی ترقی کی شرح میں اضافے اور قرضوں کی ادائیگی منیجمنٹ پر بات چیت کی۔ علاوہ ازیں، پاکستان نے صحت عامہ، تعلیم اور ماحولیاتی تبدیلیوں کے اثرات کم کرنے کے لیے بھی اقدامات اٹھائے ہیں۔
آئی ایم ایف نے کہا کہ پاکستان کے ساتھ جاری بات چیت مثبت رہی ہے، اور دونوں طرف سے مزید مذاکرات کا سلسلہ آن لائن جاری رکھا جائے گا۔ پاکستان نے 37 ماہ کے قرض پروگرام کے پہلے جائزے پر اسٹاف لیول معاہدے کی طرف پیشرفت کی ہے۔
آئی ایم ایف کے اعلامیے میں مزید کہا گیا ہے کہ گزشتہ روز وزیر خزانہ کے ساتھ آخری مذاکرات ہوئے، جس میں آئی ایم ایف نے پاکستان کو معاشی تعاون فراہم کرنے کی یقین دہانی کرائی۔
