اسلام آباد: محکمہ موسمیات کے بیان کے مطابق فلکیات کے پیرامیٹرز تجویز کرتے ہیں کہ شوال کا نیا چاند 25 جون کو دیکھا جا سکے گا۔ شوال کا چاند 24 جون کی صبح 7 بج کر 31 منٹ پر کراسنگ کنجنکشن پوائنٹ پر پیدا ہو جائے گا اور رمضان کی 29 تاریخ یعنی 25 جون کی شام واضح طور پر دکھائی دے گا۔ میٹ آفس کا کہنا ہے کہ عید الفطر کا چاند ملک کے زیادہ تر علاقوں میں دکھائی دے گا تاہم موسم 'کافی یا جزوی ابرآلود' ہو گا۔
دوسری جانب پشاور کی مسجد قاسم کے مفتی شہاب الدین پوپلزئی سمیت دیگر علما کی جانب سے چاند کی شہادت کے آزاد اعلانات کے بعد پیدا ہونے والے تنازع سے نمٹنے کے لیے وزارت مذہبی امور نے رواں سال مرکزی رویت ہلال کمیٹی کا اجلاس پشاور میں کرنے کا فیصلہ کیا ہے۔
اس حوالے سے وزارت مذہبی امور سردار محمد یوسف کا حال ہی میں کہنا تھا کہ ہم مفتی پوپلزئی کو اجلاس میں مدعو کریں گے اور توقع کی جا رہی ہے کہ اگر وہ خود نہیں آتے تو اپنا نمائندہ بھیج دیں گے۔ اسی دوران حکومت بھی رویت ہلال کمیٹی سے جڑے قوانین کو منظم کرنے میں مصروف ہے تاہم چونکہ یہ اختیار صوبوں کو منتقل کیا جا چکا ہے لہذا اس حوالے سے وفاقی حکومت کو صوبوں کی منشا بھی درکار ہے۔
دلچسپ بات یہ کہ مرکزی رویت ہلال کمیٹی جس کے موجودہ سربراہ مفتی منیب الرحمٰن ہیں کی کوئی قانونی حیثیت نہیں کیونکہ یہ اختیار 2010 میں صوبوں کو منتقل کر دیا گیا تھا۔ تاہم اس کمیٹی کو اب بھی وفاقی اور صوبائی حکومت کی جانب سے چاند دیکھنے کے لیے مناسب فورم کے طور پر پہچانا جاتا ہے۔
نیو نیوز کی براہ راست نشریات، پروگرامز اور تازہ ترین اپ ڈیٹس کیلئے ہماری ایپ ڈاؤن لوڈ کریں
