شنگھائی: ایک نئی طبی تحقیق میں یہ بات سامنے آئی ہے کہ اسمارٹ فونز اور دیگر اسکرینوں کے سامنے زیادہ وقت گزارنے سے بچوں کی نیند کا معیار خراب ہو جاتا ہے۔ چین کی شنگھائی نارمل یونیورسٹی کی اس تحقیق میں بتایا گیا ہے کہ اسکرینوں کے استعمال سے بچوں میں نیند کی کمی، توجہ مرکوز کرنے میں مشکلات اور رویوں کے مسائل جیسے چڑچڑاپن اور تنہائی پسند ہونے کے رجحانات دیکھے گئے ہیں۔
اس تحقیق میں 3 سے 6 سال کی عمر کے 571 بچوں کی ماؤں سے سروے کیا گیا۔ ماؤں سے پوچھا گیا کہ ان کے بچے روزانہ اسکرینوں (جیسے ٹیلی ویژن، اسمارٹ فونز، کمپیوٹر یا دیگر ڈیوائسز) کے سامنے کتنا وقت گزارتے ہیں۔ پھر ان بچوں کے رویوں جیسے چڑچڑاپن، دوسروں سے دور رہنے یا اکیلے وقت گزارنے کی ترجیحات اور نیند کے معیار کے بارے میں سوالات کیے گئے۔
تحقیق کے نتائج کے مطابق، بچوں کے اسکرین کے سامنے زیادہ وقت گزارنے سے نہ صرف ان کی نیند کے معیار میں کمی آئی بلکہ ان کے رویے بھی متاثر ہوئے، جس سے والدین کو اضافی پریشانی کا سامنا کرنا پڑا۔ ماہرین کا کہنا ہے کہ بچوں کی نیند اور ان کے رویوں پر اسکرینوں کے اثرات کو کم کرنے کے لیے والدین کو اسکرین کا استعمال محدود کرنا چاہیے اور بچوں کو مناسب نیند اور صحت مند روٹین کی اہمیت سے آگاہ کرنا چاہیے۔
