لاہور:قومی کرکٹ ٹیم کے بلے باز احمد شہزاد نے پی ایس ایل9 میں جگہ نہ ملنے پر دلبرداشتہ ہو کر پاکستان سپر لیگ سے ریٹائرمنٹ کا اعلان کر دیا۔
احمد شہزاد نے سماجی رابطے کی ویب سائت ایکس پر ایک پیغام جاری کرتے ہوئے کہا کہ پاکستان سپر لیگ کو دلی الوداع!، ان کا کہنا تھا کہ میں یہ نوٹ لکھ رہا ہوں جو میں نے سوچا تھا کہ میں اس سال نہیں لکھوں گا۔ پی ایس ایل کا ایک اور ڈرافٹ گزر گیا اور وہی پرانی کہانی - مجھے نہیں سلیکٹ کیا گیا۔ خدا جانے کیوں!
انہوں نے اپنے پیغام میں لکھا کہ "لیکن وہ تدبیر کرتے ہیں، اور اللہ بھی تدبیر کرتا ہے، بیشک اللہ بہترین منصوبہ ساز ہے۔"
A heartfelt goodbye! pic.twitter.com/7NdjpCXjeR
— Ahmad Shahzad ???????? (@iamAhmadshahzad) December 15, 2023
قومی کرکٹ ٹیم کے بلے باز کا کہنا تھا کہ میں نے پچھلے کچھ سالوں میں مسلسل ڈومیسٹک سرکٹ میں یہ سب کچھ دے کر بہت کوشش کی ہے، اور پی ایس ایل ڈرافٹ سے عین قبل نیشنل ٹی ٹوئنٹی کپ میں معقول کارکردگی کا مظاہرہ کیا ہے۔
انہوں نے کہا کہ ایسا لگتا ہے کہ مجھے باہر رکھنے کی جان بوجھ کر کوشش کی گئی ہے، یہاں تک کہ جب فرنچائزز نے مجھ سے کم نمبر والے دوسرے کھلاڑیوں کا انتخاب کیا ہے لیکن جب سب کچھ پہلے سے طے شدہ ہے تو اس سے کوئی فرق نہیں پڑتا۔
قومی کرکٹ ٹیم کے بلے باز احمد شہزاد کا کہنا تھا کہ مجھے نہیں معلوم کہ پی ایس ایل میں ٹاپ ڈومیسٹک پرفارمرز کو شامل کرنا کس کی ذمہ داری ہے۔لیکن مجھے پی ایس ایل کا حصہ نہ بنانے کی وجوہات کا بخوبی علم ہے - پورا ملک، اور میرے پرستار بھی بہت جلد جان جائیں گے۔
