لاہور: ملک بھر میں ڈینگی مچھروں کے حملے بڑھ گئے ، چوبیس گھنٹوں میں 658 افراد ڈینگی بخار میں مبتلا ہوگئے ، جن میں بچے بھی بڑی تعداد میں شامل ہیں ۔
محکمہ صحت کے مطابق کئی شہروں میں ہسپتالوں کے ڈینگی وارڈ بھر چکے ہیں ۔ کراچی سمیت سندھ میں 161 مریضوں میں وائرس کی تصدیق ہوئی ہے ۔ صوبے میں اب تک نو افراد ڈینگی سے لقمہ اجل بن چکے ہیں ۔
خیبرپختونخوا میں 205 افراد ڈینگی بیماریوں کے باعث ہسپتال لائے گئے ہیں ۔ مردان سب سے زیادہ متاثر ہے ، جہاں 100 نئے ڈینگی کیسز سامنے آئے ہیں ۔
اسلام آباد میں بھی ڈینگی کا مرض تیزی سے پھیل رہا ہے ۔ جہاں چوبیس گھنٹے میں 128 افراد ڈینگی بخار میں مبتلا ہوئے ہیں ۔ متاثرین کی زیادہ تعداد کا تعلق دیہی علاقوں سے ہے ۔
ادھر ، پنجاب میں چوبیس گھنٹے میں ڈینگی مچھر سے 164 افراد متاثر ہوئے ۔ سب سے زیادہ لاہور سے 67 اور راولپنڈی سے 63 افراد میں ڈینگی وائرس کی تشخیص ہوئی ہے ۔
