اسلام آباد: وزیراعظم عمران خان نے کہا ہے کہ لاکھوں بچوں کو سکول واپسی پر خوش آمدید کہتے ہیں۔
سماجی رابطوں کی ویب سائٹ ٹوئٹر پر اپنے ایک بیان میں وزیراعظم نے کہا کہ ان کی ترجیح اور اجتماعی ذمہ داری ہے کہ ہر بچہ حصولِ علم کیلئے بحفاظت سکول جاسکے، ہم نے سکولوں میں تدریسی سرگرمیوں کو صحتِ عامہ کے قواعد سے ہم آہنگ بنانے کا بطورِ خاص اہتمام کیا ہے۔
عمران خان نے ایک اور ٹویٹ میں کہا کہ اگست میں سمندر پار پاکستانیوں نے ترسیلاتِ زر کی مد میں 2 ہزار 95 ملین ڈالر بھجوائے، جو گزشتہ سال اگست کے مقابلے میں چوبیس اعشاریہ چار فیصد زیادہ ہیں۔
جولائی میں یہ ترسیلات دو اعشاریہ سات چھ آٹھ ملین ڈالر کی ریکارڈ سطح تک پہنچیں۔وزیراعظم کا کہنا تھا رواں مالی سال کے پہلے 2 ماہ کے دوران یہ ترسیلات گزشتہ برس کے اسی دورانیے کی نسبت 31 فیصد زیادہ رہیں۔
