نئی دہلی: سابق بھارتی ٹینس کھلاڑی ثانیہ مرزا کو دبئی سپورٹس کونسل کی جانب سے کھیلوں کا سفیر مقرر کیا گیا ہے۔ یہ اعلان ثانیہ مرزا نے اپنے مداحوں کے ساتھ انسٹاگرام پر شیئر کیا۔
انسٹاگرام پر ایک تصویر پوسٹ کرتے ہوئے ثانیہ مرزا نے کہا، "دبئی کے لیے کھیلوں کا سفیر بننا میرے لیے ایک عظیم اعزاز ہے۔" انہوں نے دبئی سپورٹس کونسل کے زیر اہتمام منعقدہ تقریب کی چند تصاویر بھی شیئر کیں اور اس موقع پر کہا، "اس ناقابلِ یقین موقع کے لیے دبئی اسپورٹس کونسل کا شکریہ۔"
ثانیہ مرزا کی اس کامیابی پر سوشل میڈیا پر مداحوں کی جانب سے مبارکباد کا سلسلہ جاری ہے۔
دبئی سپورٹس کونسل کی یہ اہم شراکت داری دبئی کے وژن کو آگے بڑھانے کے لیے کی گئی ہے، جس کا مقصد کھیلوں کی اہمیت کو اجاگر کرنا اور صحت مند طرز زندگی کو فروغ دینا ہے۔
