لاہور : محکمہ موسمیات نے ملک کے مختلف علاقوں میں گرج چمک کے ساتھ بارش کی پیشگوئی کی ہے، جب کہ بیشتر علاقوں میں موسم خشک اور مطلع جزوی ابر آلود رہنے کی توقع ہے۔
اسلام آباد اور گرد و نواح میں تیز ہواؤں اور گرج چمک کے ساتھ بارش ہونے کا امکان ہے۔ اسی طرح، راولپنڈی، اٹک، جہلم، چکوال، ملتان، لیہ، منڈی بہاؤالدین، سرگودھا، میانوالی، خوشاب، گجرات، سیالکوٹ، نارووال، لاہور، گوجرانوالہ، فیصل آباد اور شیخو پورہ میں بھی چند مقامات پر تیز ہواؤں اور گرج چمک کے ساتھ بارش متوقع ہے۔
مری، گلیات اور گرد و نواح میں مطلع ابر آلود رہنے کے علاوہ بارش کی توقع ہے۔ ملتان، ڈیرہ غازی خان اور بہاولپور میں آندھی چلنے کا امکان ہے۔ چترال، دیر، سوات، کوہستان، شانگلہ، بٹگرام، مانسہرہ، ایبٹ آباد، نوشہرہ، صوابی، مردان، بونیر، پشاور، کوہاٹ، کرک، بنوں، باجوڑ، مہمند، کرم، خیبر اور وزیرستان میں تیز ہواؤں اور گرج چمک کے ساتھ بارش اور بلند و بالاپہاڑوں پر برفباری کی پیشگوئی کی گئی ہے۔
بلوچستان کے بیشتر اضلاع میں موسم خشک رہے گا، تاہم شمالی اضلاع میں جزوی طور پر مطلع ابر آلود رہنے کی توقع ہے، اور کوئٹہ، زیارت اور ژوب میں چند مقامات پر ہلکی بارش ہو سکتی ہے۔ سندھ کے بیشتر اضلاع میں موسم خشک رہنے کی توقع ہے، تاہم بالائی سندھ میں تیز ہوائیں چلنے کا امکان ہے۔
آج کشمیر اور گلگت بلتستان میں مطلع ابر آلود رہنے کے علاوہ بارش اور پہاڑوں پر برفباری کی توقع ہے، اور کشمیر میں بعض مقامات پر تیز بارش اور برفباری کی پیشگوئی کی گئی ہے۔
