مکہ مکرمہ : رمضان المبارک کے پہلے عشرے میں مسجدالحرام میں عبادت اور زیارت کیلئے آنے والے زائرین کی تعداد نے نیا ریکارڈ قائم کیا ہے۔ حرمین شریفین کے امور کی جنرل اتھارٹی کے مطابق، ماہ صیام کے ابتدائی 10 دنوں میں مسجدالحرام میں آنے والے زائرین کی تعداد دو کروڑ 50 لاکھ سے تجاوز کر گئی، جو ایک منفرد اور تاریخی سنگ میل ہے۔
اتھارٹی نے مزید بتایا کہ اسی عرصے کے دوران 55 لاکھ سے زائد مسلمانوں نے عمرہ ادا کیا، جو اس مقدس مقام پر مذہبی سرگرمیوں میں نمایاں اضافے کی نشاندہی کرتا ہے۔ زائرین کی بڑھتی ہوئی تعداد کو منظم کرنے کے لیے وسیع پیمانے پر انتظامات کیے گئے ہیں۔
11 ہزار سے زائد ملازمین مسجدالحرام کے صحن اور گزرگاہوں میں عبادت گزاروں کی رہنمائی کے لیے تعینات کیے گئے ہیں۔ علاوہ ازیں، 350 سعودی نگران اور چار ہزار صفائی کارکن زائرین کی سہولت اور صفائی کی نگرانی کر رہے ہیں۔ مسجدالحرام میں زائرین کے لیے 20 ہزار زمزم ڈسپنسر بھی فراہم کیے گئے ہیں تاکہ انہیں آسانی سے پانی مل سکے۔
