جکارتہ: جنوب مشرقی ایشیائی ممالک کی تنظیم ’’آسیان‘‘ کے بارے میں انڈونیشیا کے صدر کاکہنا ہےکہ آسیان کسی بھی ملک کا پراکسی نہیں بن سکتا۔انڈونیشیا کے صدر جوکو ویدوڈو نے خبردار کیا ہے جنوب مشرقی ایشیائی ممالک کی تنظیم ’’آسیان‘‘ کسی بھی ملک کا پراکسی نہیں بن سکتا ہے۔
ایشیا پیسیفک میں امریکہ اور چین کے درمیان حالیہ کشیدگی پر آسیان کے رکن ممالک کے وزرائے خارجہ کے اجلاس سے خطاب میں انڈونیشیا کے صدر جوکو ویدوڈو نے کہا تنظیم کسی بھی ایک ملک کے لیے پراکسی نہیں بن سکتی۔ بین الاقوامی قانون کا مسلسل احترام کیا جانا چاہیے۔
اجلاس میں چین اور امریکہ نے بھی شرکت کی۔ یہ اجلاس جنوبی بحیرہ چین، میانمار اور تائیوان تنازع کے ممکنہ حل کے تلاش کے لیے ہو رہا ہے۔جنوبی بحیرہ چین آبی گزرگاہ پر اختلافات نے جنوب مشرقی ایشیائی ممالک کی تنظیم کے کچھ رکن ممالک کو چین کے خلاف کھڑا کر دیا ہے۔ جس سے امریکی مخالفت کے لیے ہمدردی کو بڑھاوا ملا ہے جب کہ ایک گروپ چین کی حمایت میں امریکا کو قصور وار ٹھہراتا ہے۔
اس پر انڈونیشیا کے صدر جوکو وڈوڈو نے امریکہ اور چین کا نام لیے بغیر واضح کیا کہ آسیان کسی بھی ایک ملک کا پراکسی نہیں بن سکتا ہے۔ ہم آسیان میں اتحاد اور یکجہتی کے ساتھ ساتھ مرکزیت کو مضبوط بنانے کے لیے پرعزم ہیں تاکہ خطے میں امن اور استحکام کی حفاظت کی جا سکے۔
