اسلام آباد :ریکوڈک کیس میں پاکستان کو تقریباً6 ارب ڈالر جرمانے پر وفاقی وزیر برائے سائنس و ٹیکنالوجی فواد چودھری بھی بھڑک اٹھے اور اپنے ہی ساتھی پی ٹی آئی کے سینئر رہنما حامد خان کو جیل بھیجنے کا مطالبہ کردیا۔
تفصیلات کے مطابق فواد چودھری نے یہ مطالبہ ریکوڈک کیس میں عالمی بینک کا فیصلہ آنے کے بعد کیا ہے۔ پاکستان کو 6 ارب ڈالر کا نقصان ہونے پر وفاقی وزیر سائنس اینڈ ٹیکنالوجی نے ٹوئٹر پر اپنے رد عمل میں کہا کہ ’ افتخار چودھری کے فیصلوں کی قیمت پاکستان مسلسل ادا کر رہا ہے، ایک اعلیٰ سطحی کمیشن اس شخص کے فیصلوں کے میرٹس جانچنے کیلئے بننا چاہئے، افتخار چودھری ، حامد خان اور اس کے دیگر ساتھیوں کو پاکستان کو ناقابل تلافی نقصان پہنچانے کے جرم میں جیل بھیجنا چاہئے۔‘
افتخار چوہدری کے فیصلوں کی قیمت پاکستان مسلسل ادا کر رہا ہے، ایک اعلیٰ سطحی کمیشن اس شخص کے فیصلوں کے میرٹس جانچنے کیلئے بننا چاہئے، افتخار چوہدری ،حامد خان اور اس کے دیگر ساتھیوں کو پاکستان کو ناقابل تلافی نقصان پہنچانے کے جرم میں جیل بجیجنا چاہئے۔ pic.twitter.com/29e8ubSV0f
— Ch Fawad Hussain (@fawadchaudhry) July 13, 2019
خیال رہے کہ عدلیہ بحالی تحریک کے دوران حامد خان اس وقت کے چیف جسٹس افتخار محمد چودھری کے وکیل تھے۔ انہوں نے گزشتہ دنوں فواد چودھری پر یہ الزام عائد کیا تھا کہ وہ لوگوں سے پیسے لے کر اپنے چچا سابق چیف جسٹس لاہور ہائیکورٹ افتخار حسین چودھری کے دور میں کیسز کے فیصلے کرایا کرتے تھے۔خیال رہے کہ عالمی بینک نے پاکستان کو تقریباً 6 ارب ڈالر کا جرمانہ عائد کیا ہے۔ یہ جرمانہ ریکوڈک پر کام کرنے والی کمپنی کا لائسنس کینسل کرنے پر سنایا گیا ہے۔
