ٹانک : پاک فوج کے شعبہ تعلقات عامہ (آئی ایس پی آر) کے مطابق خیبرپختونخوا کے مختلف علاقوں میں سیکیورٹی فورسز نے 2 الگ الگ آپریشنز کے دوران 8 خارجیوں کو ہلاک کر دیا۔
پہلا آپریشن ٹانک میں کیا گیا، جہاں سیکیورٹی فورسز کو خارجیوں کی موجودگی کی اطلاع ملی تھی۔ انٹیلی جنس بیسڈ آپریشن کے دوران فورسز نے 6 خارجیوں کو ہلاک کر دیا۔ دوسرا آپریشن ضلع خیبر کی تیراہ وادی میں کیا گیا، جہاں 2 خارجی مارے گئے۔ آئی ایس پی آر کے مطابق علاقے میں مزید خارجیوں کے خاتمے کے لیے کلیئرنس آپریشن جاری ہے۔
یہ کارروائیاں 12 جنوری کو شمالی وزیرستان میں کی جانے والی کارروائیوں کے بعد ہوئی ہیں، جہاں سیکیورٹی فورسز نے 2 الگ الگ آپریشنز میں 9 خوارج کو ہلاک کیا تھا۔ شمالی وزیرستان کے علاقے دوسالی میں خوارج کی موجودگی کی اطلاع پر سیکیورٹی فورسز نے آپریشن کیا، جس میں 6 خوارج ہلاک ہوئے اور 2 کو گرفتار کیا گیا۔