لاہور : ملک کے بیشتر علاقوں میں شدید دھند کی صورتحال کے باعث مختلف مقامات سے موٹرویز کو ٹریفک کے لیے بند کردیا گیا ہے۔ ترجمان موٹروے پولیس کے مطابق، موٹروے ایم 1 رشکئی سے صوابی اور ایم 3 درکھانہ سے سمندری تک بند ہیں، جبکہ ایم 4 ملتان سے عبدالحکیم اور ایم 5 ملتان سے روہڑی تک بھی دھند کے باعث بند کر دی گئی ہیں۔
موٹروے پولیس نے عوام کو آگاہ کیا کہ موٹرویز کو عوام کی حفاظت اور محفوظ سفر کو یقینی بنانے کے لیے بند کیا گیا ہے۔ شہریوں کو ہدایت دی گئی ہے کہ وہ دن کے اوقات میں سفر کریں اور غیر ضروری سفر سے گریز کریں۔ مزید برآں، ڈرائیورز کو تیز رفتاری سے بچنے، اگلی گاڑی سے مناسب فاصلہ رکھنے اور فوگ لائٹس کا استعمال کرنے کی درخواست کی گئی ہے۔ معلومات اور مدد کے لیے ہیلپ لائن 130 سے رابطہ کیا جا سکتا ہے۔
